Hindi ito Science o Math

Marami akong natutunan sa Pisay. Natuto akong mag-cram ng todo kahit hanggang sa last minute deadline. Syempre, may mga natutunan din ako sa sciences at math (dapat lang.) Natuto akong magbalanse ng chemical equations, hanapin ang area sa pagitan ng x-axis at isang function, kabisaduhin ang limpak-limpak na scientific names ng mga hayop at halaman (kahit panandalian lang) at gumawa ng motor gamit ang magnetism! Pero kahit sangkatutak ang nalaman ko sa sciences at math, ang nakaimpact sa akin sa Pisay ay PE!

Hindi naman ako ang pinakamalusog na tao sa mundo at hindi rin ako ang pinakamaliksi at sporty. Kung tutuusin, mas gusto ko pa ang upu-upo lang at patulug-tulog lang. Sa dati kong school, nakaka-surive ako sa PE kasi maraming written test at mas kaunti ang practical test. Karaniwan naman, puro katutubong sayaw ang itinuturo sa amin. Kaunti lang din ang natutunan kong sport kasi may isang pokus lang sport sa isang taon, tapos puro katutubong sayaw at gymnastics at physical fitness.

Sa Pisay, talagang inabangan ko na ang sciences at math at naihanda ko ang sarili ko kung saka-sakali mang bumagsak ako. Ika nga nila "cream of the cream of the crop" ang mga tao dito kaya talagang mahirap ang subjects. Talagang na-culture shock ako sa PE kasi hindi dinadaan sa written exam, mas madalas naglalaro lang ng sports. Ang mas nakakagulat sa akin, halos every quarter ay ibang sport na ang nilalaro namin! Nung una, hirap akong mag-adjust. Madalas masakit ang katawan ko pagkatapos ng PE. Pero nung nasanay na ako, mas naeenjoy ko na ang game. Siguro nga hindi ako ang pinakamagaling, pero masaya na ang paglalaro ng sports; hindi lang ito dahil sa grades. Mas dumami rin ang range ng sports na kahit papaano alam ko ang rules at alam ko ang basic skills. Isa pang naging impact sa akin ay nabawasan ang pagiging tamad. Ngayon, kapag wala na akong ginagawa, hindi na ako mapakali. Maya-maya, may hawak na akong bola ng volleyball o kaya naman, raketa ng badminton at nakikipaglaro. Ang totoo nga niyan, napapaisip pa ako minsan na sana maganda ang height ko para maging player ng isang sport.

Siguro, mas madalas maisip ng ibang tao na kapag lumabas ka ng Pisay, nerd ka lang o mahilig ka lang sa academics. Pero para sa akin, astig din ang PE sa Pisay, kahit weird isipin.

- LC Castellano